L ciastel maiestëus merca coche degun auter frabicat l cheder dla zità. La tor chedra bela stania cun si tët sciche na piramida, la njontes di frabicac abitei y n ultima la bandiera tiroleja cueciun blancia tl vënt, toca zënzauter pra l cheder dla zità. L ciastel ie privat y l sta i patrons laite, daviadechël ne possen nia l vijité.

L frabicat ie unì fat su tl 1255. I nëubli putënc de Jevun ova fat su l ciastel de Branzoll per pudëi cuntrolé chi che jiva su sun Jevun.
La rejon fova i stritoc anunji cun l vëscul de Persenon. Ala fin dla finedes fova i vëscui stac boni de sëurantò l ciastel y de fé dainora la sënta de n aministradëur numinà dal vëscul. Coche n grof ovel da aministré y sce n cajo nce da defënder l ciastel Branzoll.

Ma tl 1533 fovela pona suzeduda. N meldefuech ova desdrù l ciastel dl vëscul sun Jevun a na maniera che n ne pudova nia plu sté laite. Perchël fova la sënta dl capitan unida trapineda ju tl ciastel Branzoll.
150 ani plu tert fova pona nce vardù ju Branzoll. Mé la mureda dedoravia se ova mantenì y duminova coche sedim la zità. Ma sasc dla mureda burdlova for inò ju y manaciova la cëses dla zità. Sun chëla ova la curia dl vëscul n valgun ani dan l 1900 scincà l sedim al chemun de Tluses. Y cun l culeziunist d’ert y pasciunà de ciastiei, l dut. Karl Traut de Dispruch, ova l chemun giatà n cumpradëur nteressà. Ël ova frabicà na njonta nueva ala tor storica per pudëi sté laite. Cun gran sentimënt per l’ert ova Traut fat su na bela cësa d’abitazion che fej mo ncuei paruda y che ti semea a na drëta furtëza medievela.