N gaujion dl aniverser di 300 ani dl cunvënt iel tl 1986 unì fat su te cianton dan la dlieja dl cunvënt n droch. L artist Martin Rainer de Persenon nes mostra te chësta opra d’ert l svilup religëus y storich dl Crëp Sant dl Tirol. Tl zënter ie i simboi dla trinità: l uedl per Chël Bel Die, l aniel cun la crëusc per l Fi de Die y la tupa (sëura l’ega) per l Spirt Sant. Tamez udons l vëscul Nuin che ti sëurandà l alfa y l omega coche sëni dla Sacra Scritura a si suzessëur nchina ncuecundì.

La storia dl orden de Jevun vën reprejenteda dala doi figures sun ëur. A man ciancia ons San Benedët y a man drëta Santa Scolastica cun na nuvizia y la regula cunesciuda ora et labora.
L frabicat stilisà reprejënta Jevun coche luech de pelegrinaje. I pelegrins vën da man ciancia y da man drëta. L prim se cufa ju per bever, o simbolicamënter per se paré la sëit pra la funtana dl crëidum. La filza de pelegrins a man drëta mostra i badioc che vën bele da centeneies incà sun Jevun.