La dlieja dla Santa Crëusc ie sun la piza plu auta dl crëp de Jevun y tres i centeneies iela for inò unida cumededa ora. Pervia de si luegia, i depënc a frësch de marueia y l Crist espressif sun l gran autere, iela l zënter dl crëidum sun l Crëp Sant.
Dla prima dlieja, fata su ntëur l 600, ne vëijen ncuei plu tan che nia. La mureda mpunënta dedora via, scarpeleda ora a chedri dl sas de diorit, ie la pert plu vedla. L meldefuech dl 1533 ova desdrù defin l frabicat da dant. Cun i lëures per l frabicat nuef dl cunvënt dal 1677 nchina tl 1680, fovel nce unì fat su la dlieja dla Santa Crëusc che on ncuei.

La pert dedite dla dlieja ie na pitla marueia cun si pitures sun i parëies y sussot che mostra la ntraunides dl mister da Pasca. N jega che l artist fova l sudtirolesc Johann Baptist Hueber.
L’opra d’ert de majera mpurtanza tla dlieja dla Santa Crëusc ie l gran Crist gotich sun l gran autere. La lijënda conta che l fova unì scunà dal meldefuech dl 1533. L Crist ie unì ziplà dal moster Leonhard de Persenon ntëur l 1470, y nchina ncueicundì vën truep pelegrins da dalonc y da daujin per l mpluré.